Þorsteinn Vilhjálmsson, prófessor emeritus í eðlisfræði og vísindasögu, hefur hlotið styrk úr Almanakssjóði til að vinna að útgáfu bókar með vinnuheitinu Agnir – afstæðir – skammtar. Bókin mun geyma greinar eftir Albert Einstein frá árinu 1905 og annað stoðefni fyrir íslenska lesendur.
Markmið bókarinnar eru að kynna mikilvæg atriði í eðlisfræði nútímans fyrir íslenskum almenningi á íslensku og efla þannig bæði áhuga á vísindum í landinu og styrkja stöðu íslenskunnar gagnvart vísindum og tækni.
Árið 1905 hefur verið kallað ár kraftaverkanna í ævi Alberts Einstein. Hann birti þá fimm greinar sem hafa allar reynst mikilvægar í þróun eðlisfræðinnar æ síðan. Í tveimur þeirra leggur Einstein grundvöllinn að afstæðiskenningunni og önnur grein felur í sér veigamikið framlag til skammtafræðinnar sem þá var í fæðingu. Tvær greinar fjalla um eðlisfræði sameinda sem þá var mjög farin að mótast. Greinarnar fimm hafa nokkrum sinnum verið teknar saman í bækur á erlendum málum og er því fordæmi fylgt hér.
Greinarnar birtast allar í bókinni í íslenskri þýðingu Þorsteins með allrækilegum inngangsköflum sem eiga að varpa ljósi á Einstein sem vísindamann og persónu ásamt því að skýra efni greinanna, dýpka það og setja í fræðilegt og sögulegt samhengi. Höfundar inngangskaflanna eru Þorsteinn Vilhjálmsson, Þorsteinn J. Halldórsson og Jakob Yngvason.
Almanakssjóður var stofnaður árið 1973. Markmið sjóðsins er m.a. að styrkja rannsóknir í stjarnfræði og rímfræði, stærðfræði og stærðfræðilegri eðlisfræði og útgáfu vísindalegra rita í þessum fræðum. Þetta er annar styrkurinn sem veittur er úr sjóðnum á þessu áari.