Fimm verkefni hafa hlotið styrk úr Íslenskusjóðnum við Háskóla Íslands. Þetta er í fimmta sinn sem úthlutað er úr sjóðnum og heildarupphæð styrkja nemur fjórum milljónum króna.
Markmið Íslenskusjóðsins er að veita styrki til að efla vald á íslensku máli meðal barna og fullorðinna, einkum fjöltyngdra barna af erlendum uppruna og foreldra þeirra. Sjóðurinn styrkir þróunarverkefni á leiks- og grunnskólastigi, námskeið, bókaútgáfu, t.d. fjölmálabóka, vefsíður, efni fyrir snjalltæki og annað sem álitlegt þykir til að ná markmiði sjóðsins.
Aleksandra Kozimala, kennsluráðgjafi fjölmenningar í leikskólum Hafnarfjarðar, Helga Rut Guðmundsdóttir, prófessor í tónlistarfræðum við Háskóla Íslands, Jenný Dagbjört Gunnarsdóttir, þróunarfulltrúi leikskóla, og Bryndís Steina Friðgeirsdóttir, forstöðumaður Nýsköpunarseturs Hafnarfjarðar fengu styrk fyrir verkefnið „TÍLI - Töfrar íslenskrar tónlistar og leiks“. Um er að ræða þróunarverkefni sem miðar að því að styðja fjöltyngd börn í íslenskunámi á leikskólastigi. Það sameinar kraft tónlistar, hreyfingar og leiks til að auðvelda börnum að læra ný orð, tjá sig og tengjast öðrum. Verkefnið er unnið í samstarfi sérfræðings í fjölmenningu og fjöltyngi í leikskólum Hafnarfjarðar og tónlistarfólks frá Tónagulli, sem hefur sérhæft sig í að nota tónlist til að styðja við málþroska ungra barna. Þrír leikskólar í Hafnarfirði taka þátt í verkefninu en þar eru fjöltyngd börn stór hluti nemendahópsins. Í upphafi verður einblínt á að móta aðferðina, velja lög, þjálfa kennara og útbúa efni fyrir foreldra.
Fatou N’dure Baboudóttir og Tinna Björk Helgadóttir, verkefnastjórar Frístundalæsis, hafa hlotið styrk til þróunar verkefnisins „Tilfinningalæsi – spil og veggspjald fyrir frístundaheimili á Íslandi“. Markmið verkefnisins er að efla tilfinningalæsi, orðaforða og íslenskukunnáttu barna á aldrinum sex til níu ára með leik og reynslunám í forgrunni. Verkefnið felur í sér þróun tveggja hagnýtra verkfæra fyrir frístundaheimili, þ.e. veggspjalds með myndum af 25 tilfinningum ásamt íslenskum heitum og samstæðuspils þar sem sömu tilfinningar eru settar fram á íslensku og á nokkrum algengum tungumálum barna á Íslandi. Með því að setja heiti tilfinninga fram á fjölbreyttum tungumálum er leitast við að ná til barna með fjölbreyttan menningar- og tungumálabakgrunn og stuðla að inngildingu þeirra í íslensku samfélagi. Efninu verður dreift á frístundaheimili um allt land og gert aðgengilegt á vef Frístundalæsis. Verkefnið byggist á grunni Frístundalæsis og er unnið í samstarfi við skóla- og frístundasvið Reykjavíkurborgar og verkefnið Menntun-menning-móttaka sem er á vegum Miðstöðvar menntunar og skólaþjónustu.
Huld Hafliðadóttir, stofnandi STEM Íslands og forstöðukona STEM Húsavík, ásamt STEM Húsavík og Móðurmáli Norðurlands fengu styrk fyrir verkefnið „Að nota STEM til að styðja við íslenskunám fjöltyngdra barna á Norðurlandi“. Verkefnið miðar að því að styðja íslenskunám fjöltyngdra barna á Norðurlandi með samþættingu STEM (vísinda, tækni, verkfræði og stærðfræði) og móðurmálsnotkunar. Ætlunin er að efla íslenskukunnáttu fjöltyngdra barna og foreldra þeirra með skapandi og fræðandi STEM-viðburðum þar sem áhersla er lögð á virkni og þátttöku í samfélaginu. Verkefnið byggist á rannsóknum um mikilvægi virkrar móðurmálsnotkunar og samþættingar í menntun fjöltyngdra barna. Verkefnið hefst í september 2025 og í kjölfarið verða haldnir mánaðarlegir viðburðir þar sem börn og foreldrar vinna saman að því að styrkja íslenskukunnáttu með fjölbreyttum STEM-verkefnum.
Lísa Z. Valdimarsdóttir, forstöðumaður Bókasafns Kópavogs og Eyrún Ósk Jónsdóttir, verkefnisstjóri fræðslu og miðlunar, fengu styrk fyrir hönd Bókasafns Kópavogs fyrir þróunarverkefnið „Tala og spila“ sem snýst um að bjóða upp á skemmtilega íslenskukennslu á bókasafninu á laugardögum fyrir fjölskyldur af erlendum uppruna sem vilja efla íslenskukunnáttu sína. Íslenskukennari mun halda utan um verkefnið og nýta fjölbreyttar kennsluaðferðir og miðlunarleiðir þar sem samtöl, spil og leikir gegna lykilhlutverki. Markmiðið er að gera íslenskukennsluna aðgengilega og skemmtilega fyrir alla fjölskylduna saman. Til viðbótar eru viðburðirnir hugsaðir sem notaleg samverustund fyrir fólk úr ólíkum áttum. GETA hjálparsamtök eru samstarfsaðili að verkefninu og munu útvega sjálfboðaliða til að styðja við kennsluna.
Sverrir Sigmundarson, tölvunarfræðingur og rithöfundur, fékk styrk fyrir verkefnið Íslensku Vasaskrímslin, útgáfa áhugadrifinna lestrarbóka fyrir byrjendur í lestri. Styrkurinn verður nýttur til að gefa út nýjan flokk lestrarbóka um Vasaskrímslin (e. Pokémon) á íslensku. Nýju bækurnar munu innihalda einfaldað efni upp úr lestrarbókum um Vasaskrímslin og verða sniðnar að þörfum byrjenda í lestri með áherslu á að styðja við íslenska hljóðmyndun og lestrarnám byrjenda. Lestrarbækurnar munu einnig nýtast sérkennurum og nemendum sem læra íslensku sem annað mál. Íslenska Vasaskrímslaverkefnið er óhagnaðardrifið samfélagsverkefni, sprottið upp úr fréttum af bágri lestrarfærni og íslenskukunnáttu grunnskólabarna og er öll vinna við það unnin í sjálfboðastarfi.
Um sjóðinn
Íslenskusjóðinn stofnuðu Elsa Sigríður Jónsdóttir og Tómas Gunnarsson til minningar um foreldra þeirra, þau Sigríði S. Sigurðardóttur og Jón Sigurðsson og Björgu Tómasdóttur og Gunnar Guðmundsson.
Sjóðurinn starfar samkvæmt staðfestri skipulagsskrá og í stjórn sjóðsins sitja Sara Margrét Ólafsdóttir, dósent á Menntavísindasviði og formaður stjórnar, Renata Emilsson Pesková, lektor á Menntavísindasviði og Gísli Hvanndal Ólafsson, verkefnisstjóri á Hugvísindasviði.
Styrktarsjóðir Háskóla Íslands hafa umsjón með sjóðum og gjöfum sem Háskóla Íslands hafa verið ánafnaðar allt frá stofnun hans. Flestir þeirra starfa samkvæmt staðfestri skipulagsskrá og er þeim ætlað að styðja ýmis verkefni á ákveðnum fræðasviðum til hagsældar fyrir Háskóla Íslands, stúdenta eða starfsfólk.