Styrktarsjóður Áslaugar Hafliðadóttur

Tilgangur Styrktarsjóðs Áslaugar Hafliðadóttur helgast af fyrirmælum í erfðaskrá Áslaugar. Samkvæmt erfðaskránni skal nota sjóðinn til eflingar íslenskri tungu með þeim hætti sem stjórn Háskóla Íslands telur að koma muni að mestu gagni. Það skilyrði er sett að sjóðurinn verði notaður til sérverkefna á sviði íslenskra fræða eða stuðnings við þá sem leggja stund á íslensk fræði, en gangi ekki til almenns rekstrarkostnaðar háskólans.

Styrkir skulu veittir starfsmönnum eða nemendum Háskóla Íslands til sérverkefna á vegum háskólans á sviði íslenskra fræða er falla að þessu markmiði, s.s. til rannsókna, þróunar, kennslu, þjálfunar, nýmæla eða tækja og búnaðar í þágu tilgangs sjóðsins. Sérstaklega skal stutt við verkefni er lúta að ritfærni og þjálfun nemenda allra fræðasviða háskólans við beitingu íslensks máls og til að styrkja stöðu íslenskunnar í síbreytilegu tækniumhverfi.

Sjóðurinn er stofnaður af Háskóla Íslands til minningar um Áslaugu Hafliðadóttur og foreldra hennar, þau Sesselju Eiríksdóttur og Hafliða Jón Hafliðason.

Áslaug stundaði nám í lyfjafræði við Lyfjafræðingaskóla Íslands og verknám í Ingólfs Apóteki. Eftir útskrift sem aðstoðarlyfjafræðingur hélt Áslaug til Danmerkur og lauk kandídatsprófi í lyfjafræði frá Danmarks Farmaceutiske Höjskole 1957.

Áslaug starfaði lengst af í Reykjavíkur Apóteki og Lyfjabúð Breiðholts og lagði þar m.a. mikla rækt við lyfjafræðinema frá Háskóla Íslands sem komu til verknáms undir hennar handleiðslu. Í Lyfjabúð Breiðholts starfaði Áslaug með Ingibjörgu Böðvarsdóttur apótekara. Auk samstarfs í apótekinu skrifuðu þær mikið saman um sögu lyfjafræði og vildu hlúa að sögulegri vitund í samfélaginu. Þær voru enn fremur ötulir hvatamenn að útkomu Lyfjafræðingatals. Þá vann Áslaug merkilegt starf ásamt hópi lyfjafræðinga við að koma upp Lyfjafræðisafni við Neströð á Seltjarnarnesi.

Áslaug starfaði í Íslensku esperanto-hreyfingunni í rúma þrjá áratugi og var lengi í stjórn Aúroro, esperanto-félags Reykjavíkur. Áslaug arfleiddi Náttúruverndarsamtök Íslands að sumarbústað sínum í landi jarðarinnar Hæðarenda í Grímsnesi auk 12,5% af öllum bankainnistæðum og andvirði verðbréfa, sem hún lét eftir sig.

Sjóðurinn starfar samkvæmt staðfestri skipulagsskrá og hefur sjálfstætt starfandi stjórn.

Í stjórn eru:

Höskuldur Þráinsson, prófessor emeritus, tilnefndur af rektor Háskóla Íslands.
Dagný Kristjánsdóttir, prófessor emeritus, tilnefnd af rektor Háskóla Íslands.
Viðar Guðmundsson, tilnefndur af ættingjum Áslaugar.

Staðfest skipulagsskrá Styrktarsjóðs Áslaugar Hafliðadóttur (PDF).

Úthlutunarreglur Styrktarsjóðs Áslaugar Hafliðadóttur (PDF).

Auglýsing um umsóknartímabil er sett á vef sjóða og á vef Háskóla Íslands. Einungis er opið fyrir umsóknir á auglýstum umsóknartíma.

Óskað er eftir að í umsókn komi fram:

Nafn umsækjanda, kennitala, heimilisfang, sími og virkt netfang.
Helstu atriði úr náms- og starfsferli umsækjanda.
Heiti verkefnis, markmið og vísindalegt eða hagnýtt gildi.
Hnitmiðuð lýsing á verkefninu, að hámarki 150 orð, sem verður nýtt til almennrar umfjöllunar og kynningar, hljóti verkefnið styrk.
Veigameiri lýsing á verkefninu, að hámarki ein blaðsíða, þar sem fram kemur lýsing á markmiðinu með verkefninu, framkvæmd þess og mati á afrakstri, ásamt umfjöllun um hvernig verkefnið samrýmist markmiðum sjóðsins.
Tímaáætlun og fjárhagsáætlun verkefnis.
Nöfn, símanúmer og netföng þeirra sem leita má til um meðmæli.
Ef um rannsóknarverkefni er að ræða skal gera grein fyrir helstu efnisþáttum þess.
1. Samstarfsaðilar og aðrir styrkaðilar verkefnis ef við á.
2. Hvernig styrkurinn verður notaður hljóti verkefnið styrk.
3. Upplýsingar um annan fjárhagslegan stuðning.

Áhersla er lögð á vönduð fræðileg vinnubrögð við gerð umsóknar. Með hliðsjón af eðli sjóðsins og stærð má gera ráð fyrir að vel afmörkuð verkefni sem ljúka má á 1–2 árum njóti forgangs. Framhaldsumsóknir kunna að þurfa að víkja fyrir nýjum umsóknum.

Styrkþegi skal gera grein fyrir stöðu verkefnisins að ári liðnu í framvinduskýrslu og láta fylgja sýnishorn/tilvísun í það sem hefur verið unnið. Að verkefni loknu skal skila lokagreinargerð um niðurstöður og árangur ásamt ráðstöfun fjárins og eigi síðar en tveimur árum frá styrkveitingu.

Ef styrkur er ekki nýttur í samræmi við umsókn skal honum skilað. Ekki verður tekið við nýjum umsóknum frá þeim sem ekki hafa skilað framvinduskýrslu eða lokagreinargerð vegna fyrri styrkja á tilsettum tíma.

2025

Árni Valdason og Ingvar Andrésson
Ása Bergný Tómasdóttir
Kolbrún Friðriksdóttir
Max Naylor og Eiríkur Rögnvaldsson
Vala Hauksdóttir
Þóra Másdóttir
Þórunn Rakel Gylfadóttir og Guðlaug Stella Brynjólfsdóttir

Sjá umfjöllun um styrkhafa 2025.

2024

Birna Arnbjörnsdóttir, Halldóra Jóhanna Þorláksdóttir og Þorgerður Anna Björnsdóttir
Dóra Jóhannsdóttir
Halla Hauksdóttir
Heimir F. Viðarsson
Hera Fjölnisdóttir fyrir hönd Blekfjelagsins
Jóhannes B. Sigtryggsson
Jón Yngvi Jóhannsson
Karítas Hrundar Pálsdóttir, Sigríður D. Þorvaldsdóttir og María Anna Garðarsdóttir
Rósa Elín Davíðsdóttir
Viktor Árnason og Rafn Sigurðsson